Ղարաբաղցի «տատիկն ու պապիկ»ը «երիտասարդացած» են

ԼՈՒՍԻՆԷ ՄՈՒՍԱՅԷԼԵԱՆ

Լեռնային Ղարաբաղի խորհրդանիշը իր տեղադրումէն 46 տարի ետք պաշտօնապէս բացուեցաւ: «Մենք ենք, մեր լեռները» կոչուող յուշարձանը, որ փաղաքշօրէն կ՚անուանուի նաեւ «Տատիկ-պապիկ», կառուցուած է խորհրդային տարիներուն։ Քանդակագործը Սարգիս Բաղդասարեանն է։

Կարմիր տուֆէ պատրաստուած կոթողը կը խորհրդանշէ ղարաբաղեան հողի եւ ժողովուրդի արմատներու միջեւ արիւնակցական կապը։ Ժամանակին Խորհրդային Ատրպէյճանի ղեկավարութիւնը յուշակոթողի շինարարութեան եւ անոր տեղադրման դէմ եղած է։ Աւելի՛ն, բողոք բարձրացած է Ստեփանակերտ քաղաքի մերձակայքը այդ քանդակը տեղադրելու առիթով։

«Պապիկն ու տատիկն իրենց ներկայութեամբ կոչ են անում ողջ արցախեան ժողովրդին, որ եղէք մեզ հետ, հեռուներում մի մնացէք, եկէք էստեղ, էստեղ աշխարհի լաւագոյն տեղն է»,- «Ազատութիւն» ռադիոկայանի հետ զրույցի ընթացքին ըսաւ յուշարձանի բացման մասնակցող ղարաբաղցի պապիկ մը.- «Ես պապիկ եմ, ունեմ 11 թոռ, 11 ծոռ, բոլորն էլ այստեղ են, և ոչ ոք էլ չի փոշմանում, որ չի գնացել ուրիշ տեղ, նրանք կան, կը լինեն եւ կը նմանուեն իրենց տատիկ-պապիկներին»։

Ղարաբաղի տեսարժան այս վայրը վերանորոգուած եւ բարեկարգուած է արմատներով ղարաբաղցի, Ռուսաստան բնակող գործարար Կարէն Աւագումեանի ֆինանսական օժանդակութեամբ։ Շուրջ 145 միլիոն դրամ արժէքով շինարարութեամբ պահպանուած է յուշարձանի նախնական տեսքն ու տրամաբանութիւնը: Բլուրը կանաչապատուած է եւ ոռոգման ու լուսավորման համակարգ տեղադրուած է: Դէպի յուշարձան տանող արահետը լուսաւորուած եւ քարապատուած է, իսկ յուշարձանի ստորոտը սալիկապատուած է: Այցելուներու համար կառուցուած են հանգստանալու համար նախատեսուած անկիւններ: 

www.azatutyun.am, Սեպտեմբեր 25, 2013