Գերագոյն Հոգեւոր Խորհրդի ժողովը ընդունած է Նորվան արք. Զաքարեանի հրաժարականը

Յուլիս 30-31-ին Մայր Աթոռ Ս. Էջմիածնի մէջ, Գարեգին Բ. Ամենայն Հայոց Կաթողիկոսի նախագահութեամբ, գումարուած է Գերագոյն Հոգեւոր Խորհուրդի հերթական ժողովը` ընդլայնուած կազմով:

Ժողովի նիստերուն ատենապետած է Պոլսոյ Հայոց Պատրիարքութեան պատրիարքական ընդհանուր փոխանորդ Արամ արք. Աթէշեանը:

Ցեղասպանության 100-ամեակին նուիրուած` Մայր Աթոռի միջոցառումներուն վերաբերեալ զեկոյց ներկայացուցած է յանձնախումբի ատենապետ եւ ԱՄՆ Արեւմտեան հայոց թեմի առաջնորդ Յովնան արք. Տէրտերեանը: Ժողովականները իրենց գնահատանքը յայտնած են յանձնախումբին` յանձնարարելով շարունակել միջոցառումներու նախապատրաստման աշխատանքները:

Խորհուրդը նաեւ ի գիտութիւն ընդունած է Մայր Աթոռի դիվանապետ Արշակ եպս. Խաչատրեանի զեկոյցը թեմական ուղենիշային կանոնադրութեան պահանջներուն թեմերու կանոնադրութիւններու համապատասխանեցման գործընթացի վերաբերեալ:

Տեղեկություններ տրուած են  Սեպտեմբերի 21-28-ին Մայր Աթոռ գումարուելիք Հայ Եկեղեցւոյ ընդհանուր եպիսկոպոսաց ժողովի նախապատրաստական աշխատանքներուն մասին:

Եկեղեցական ներկայացուցչական ժողովի կանոնադրութեան նախագիծի լրամշակման աշխատանքներուն մասին զեկուցած է յանձնախումբի նախագահ, Տաւուշի թեմի առաջնորդ Եզնիկ արք. Պետրոսեանը: Խորհուրդին անդամները գնահատանքով ընդունած են  զեկոյցը՝ յանձնարարելով շարունակել լրամշակման աշխատանքները:

Գերագոյն Հոգեւոր Խորհուրդը քննութեան առած է Ֆրանսայի հայոց թեմի առաջնորդ, Արեւմտյան Եվրոպայի Հայրապետական Պատուիրակ Նորվան արք. Զաքարեանի հրաժարական գրութիւնը, ինչպէս եւ Ֆրանսայի հայոց թեմին մէջ անոր առնչուած զարգացումներուն հետ կապուած հարցեր:

Յետ քննարկման, Գերագոյն Հոգեւոր Խորհուրդը ընդունած է Նորվան արք.ի հրաժարականը առաջնորդի ու Հայրապետական Պատուիրակի պաշտօններէն եւ Գերագոյն Հոգեւոր Խորհուրդի անդամութենէն եւ զայն հաստատելու խնդրանք ներկայացուցած է Վեհափառ Հայրապետին: Խորհուրդը նաեւ ափսոսանք յայտնած է հրաժարականին  մէջ Մայր Աթոռին եւ Ամենայն Հայոց Կաթողիկոսի հասցէին ուղղուած անհիմն գնահատականներուն առնչութեամբ եւ իր զօրակցութիւնը՝ Ֆրանսայի հայոց թեմի Թեմական Խորհրդին ստեղծուած իրավիճակի կարգաւորման գործին մէջ, յորդորելով նաեւ թեմի հաւատացեալներուն եւ ազգային հաստատություններուն ու կազմակերպութիւններուն` քրիստոնէական սիրոյ ոգիով նպաստել Ֆրանսայի հայոց թեմի բարեկարգութեան եւ շինութեան:

 

«Ազգ», Օգոստոս 1, 2013

 

Յ.Գ.- Բնականաբար, Նորվան արք. Զաքարեանի հրաժարականը պիտի ընդունուէր՝ հրաժարական նամակին գնահատականներուն «անհիմն» որակումով հանդերձ։ Հրաժարականին ընդունումին չէր կրնար ընկերանալ գնահատականներուն լռելեայն վաւերացումը, իսկ հրաժարականին մերժումը պիտի նշանակէր գնահատականները հիմնաւոր նկատել  («Հայկականք»)։