1.2.18

Արեւմտահայերէնը արդէն առանձին լեզուական ծածկագիր ունի

«Ուիքիմետիա Հայաստան» գիտակրթական հասարակական կազմակերպութեան եւ «Գալուստ Կիւլպէնկեան» հիմնարկի՝ արեւմտահայերէնին ISO 639-3 լեզուական ծածկագիր (code) տալու ջանքերը վերջապէս յաջողութեամբ պսակուած են: SIL International-ը, որ ISO 639-3ը արձանագրող մարմինն է, 30 Յունուար 2018ին արեւմտահայերէնին առանձին լեզուական ծածկագիր՝ «hyw», տալու որոշում տուած է:
Արեւելահայերէնն ու արեւմտահայերէնը ժամանակակից հայերէնի երկու առանձին ճիւղեր են, որոնք զարգացած են տարբեր ուղղութիւններով եւ կառուցուածքով, գրական գործերով, որոնք միշտ չէ, որ հասկանալի են միւս կողմին համար: Հայաստանի անկախացումէն ետք արեւելահայերէնը, միջին հայերէնը եւ գրաբարը առանձին լեզուական ծածկագիրներ ստացած էին, բայց ո՛չ՝ արեւմտահայերէնը:
2010ին, արեւմտահայպերէնը ներառուած էր ԵՈՒՆԵՍՔՕի աշխարհի վտանգուած լեզուներու ցանկին մէջ: Լեզուի անկումը կանխելու նպատակով, Սփիւռքի եւ Հայաստանի մէջ բազմաթիւ միջոցառումներ նախաձեռնուած են, որոնցմէ մէկը արեւմտահայերէն «Ուիքիփետիա»ի զարգացումն է: Այս աշխատանքին մէջ ներգրաւուած են բազմաթիւ անհատներ եւ կազմակերպութիւններ:
«Ուիքիմետիա Հայաստան»ը եւ «Գալուստ Կիւլպէնկեան» հիմնարկը արեւմտահայերէնին համար առանձին լեզուական ծածկագիր ստանալու գործընթացը նախաձեռնած էին 3 տարի առաջ, երբ արեւմտահայերէնով ազատ բովանդակութեան խթանման նպատակով համագործակցութեան սկսան:

 «Ասպարէզ», 1 Փետրուար 2018

1 comment:

  1. Անհրաժեշտ է: Այս լեզուին տարբերակը տարբեր է...

    ReplyDelete