Տնտեսութեան եւ Արտաքին Քաղաքականութեան Ուսումնասիրութեան Կեդրոնը «1915ի հայկական դէպքերու»ն մասին հարցախոյզ մը կատարած է ամբողջ Թուրքիոյ տարածքին։ Հարցախոյզի մասնակիցներուն առաջարկուած է ընտրել հետեւեալ հաստատումներէն մէկը.-
– 1915ին իրենց կեանքը կորսնցուցած հայերուն համար ներողութիւն պէտք է խնդրուի եւ պէտք է ընդունուի, որ գործուածը ցեղասպանութիւն էր։
– 1915ին իրենց կեանքը կորսնցուցած հայերուն համար ներողութիւն պէտք է խնդրուի, բայց բացի ատկէ՝ որեւէ այլ քայլ պէտք չէ առնուի։
– 1915ին իրենց կեանքը կորսնցուցած հայերուն համար ցաւ պէտք է յայտնուի, սակայն ներողութիւն պէտք չէ խնդրուի։
– Պէտք է նկատի առնուի, որ 1915ին իրենց կեանքը կորսնցնողները միայն հայեր չեն եղած, այլ օսմանցի հայրենակիցներ եւս մահացած են, ուստի՝ անոնց համար ալ պէտք է ցաւ յայտնուի։
– Որեւէ քայլ պէտք չէ առնուի։
– Այս նիւթին շուրջ գաղափար չունինք, ուստի՝ պատասխան չունինք։
Հարցախոյզի մասնակիցներուն 24%-ը ըսած է, որ 1915ին միայն հայեր չեն որ իրենց կեանքը կորսնցուցին, ուստի՝ բոլոր կորուստներուն համար ցաւ պէտք է յայտնել։
Մասնակիցներուն 9%-ը միայն կողմնակից եղած է ցեղասպանութեան ճանաչման, իսկ 9%-նոց այլ խմբակ մը նախընտրած է առանց պնդումները ընդունելու՝ ներողութիւն խնդրելու քայլը միայն։
21%-ը պաշտպանած է այն տեսակէտը, որ Թուրքիա պէտք չէ որեւէ քայլ առնէ հայկական ցեղասպանութեան գծով։
Ուշագրաւ է նաեւ այն իրողութիւնը, որ հարցախոյզի մասնակից անձերուն 25%-ը նախընտրած է լուռ մնալ՝ ընտրելով վերջին հաստատումը։ Ըստ Կեդրոնին կողմէ նախապէս կատարուած հարցախոյզի մը, այս նիւթին շուրջ լռութիւն նախընտրող անձերու համեմատութիւնը 10% էր, մինչդեռ այսօր այդ համեմատութեան թիւը բարձրացած է 25%-ի, ինչ որ հանրային կարծիքի զգայնութիւնը ցոյց կու տայ։ Նաեւ՝ նախապէս հայ ժողովուրդէն ներողութիւն խնդրելու կողմնակից եղած էր 9%-ը։
Յատկանշական է, որ քրտամէտ Խաղաղութիւն եւ ժողովրդավարութիւն կուսակցութեան կողմնակիցներուն մօտ, հայ ժողովուրդէն ներողութիւն խնդրելու գաղափարին համամիտ եղած է 40%-ը։
«Նոր Յառաջ», Յունուար 3, 2015
No comments:
Post a Comment