Այցերու գումար - Total Pageviews - Total de visitas

22.10.13

Հայաստանի Գրողների Միութեան նախագահ ընտրուեց Էդուարդ Միլիտոնեանը

ՄԱՆԱՆԱ ՅՈՎԱԿԻՄԵԱՆ

Հայաստանի Գրողների Միութեան նախագահի ընտրութիւնը վերջերս ամենաքննարկուողն էր: Ինչպէս տեղեակ էք, նախագահի թափուր պաշտօնի համար ներկայացուել էին երեք թեկնածու` Էդուարդ Միլիտոնեանը, Դաւիթ Սարգսեանը եւ Յովիկ Յովէեանը, ինչպէս նաեւ շրջանառւում էր Կարինէ Խոդիկեանի անունը:
Մինչ աթոռակռիւ էր ընթանում, հանրութեան մի մասը պնդում էր, որ ստեղծագործական միութիւններն իրականում մեզ հարկաւոր չեն, դրանք սովետական լճացած կառոյցներ են, սակայն...
Ինչպէս սկսել էր աթոռակռիւը, նոյն թէժ կրքերով էլ շարունակուեց համագումարը:
Խնդիրներն սկսուեցին համագումարի հէնց սկզբից` քարտուղարութիւն ընտրելիս: ՀԳՄ քարտուղարութեան կազմում ընդգրկուեցին Պետրոս Դէմիրճեանը, Աւիկ Իսահակեանը, Վազգէն Գաբրիէլեանը, Հրաչեայ Սարուխանը, իսկ քարտուղարութեան նախագահ Վազգէն Գաբրիէլեանը նշանակուեց: Սակայն Աշոտ Խաչատրեանին չգոհացրեց այս ընտրութիւնը, եւ նա պահանջեց, որ հաշուի առնեն անգամ մէկ անձի ձայնը եւ անվաւեր համարեն քարտուղարութեան կազմը:
Յաջորդ քայլը հաշուիչ յանձնաժողով ընտրելն էր: Երկարատեւ վէճերից եւ քննարկումներից յետոյ որոշուեց, որ հաշուիչ յանձնաժողովի անդամները կը լինեն առաջադրուած թեկնածուների կողմից երկուական մարդ, իսկ Վազգէն Գաբրիէլեանն առաջարկեց, որ յանձնաժողովի վերջին` եօթերորդ անդամը պէտք է լինի երիտասարդ գրողների կողմից Արքմենիկ Նիկողոսեանը:
Թատերագէտ, ՀԳՄ անդամ Լեւոն Մութաֆեանը յիշեց նախորդ ընտրութիւնների խախտումները, եւ հաշուիչ յանձնաժողովում ընտրուեցին երկուական վկաներ` առաջադրուած թեկնածուների կողմից, որպէսզի տարատեսակ խնդիրներ չառաջանան:
Ի դէպ, համագումարի ժամանակ երկու թեկնածու ինքնառաջադրուեցինՙ գրող Վլադիմիր Հայրապետեանը, որը րոպէներ անց ինքնաբացարկ յայտարարեց եւ կոչ արեց քուէարկել յօգուտ Յովիկ Յովէեանի, եւ գրող Ռոմիկ Սարդարեանը:
Անդրադառնալով համագումարին հնչած ելոյթներին, հարկ է նշել, որ դրանց ընթացքում հնչած խօսքերից կարելի էր կարծիք կազմել, ՀԳՄ-ն միայն խախտումներ է արել ու բացթողումներ ունեցել:
Անդրադառնալով ձայները հաշուելու գործընթացին, նշենք, որ սկզբում չէին ցանկանում լրագրողներին թոյլ տալ ներկայ լինել ձայների հաշուելու արարողութեանը, սակայն որոշ ժամանակ անց լրագրողներին ներս հրաւիրեցին` իրենց ներկայութեամբ ձայների հաշուելու ընթացքի արդարութիւնը փաստելու համար:
Մի շարք գրողներ դժգոհում էին, որ Սփիւռքը եւս ունի ընտրելու իրաւունք` ասելով, որ դա ձայները լցօնելու տարբերակ է:
Ձայների գերակշիռ մեծամասնութեամբ ՀԳՄ նախագահ ընտրուեց Էդուարդ Միլիտօնեանը` 199 ձայնով, Յովիկ Յովէեանն ստացաւ 100 ձայն, Դաւիթ Սարգսեանըՙ 24 ձայն, իսկ Ռոմիկ Խաչատրեանը 4 ձայն: Անվաւեր ճանաչուեց 7 թերթիկ:

«Ազգ», Հոկտեմբեր 22, 2013

No comments:

Post a Comment