Այցերու գումար - Total Pageviews - Total de visitas

16.10.13

«Արմինիըն Ռիվիւ»ի նոր թիւն ու նոր օգնական խմբագիրը

«Արմինիըն Ռիվիւ»ի խմբագրութիւնը տեղեկացուցած է, թէ արդէն լոյս տեսած պարբերաթերթին նորագոյն թիւը (2013ի Գարուն-Ամառ), եւ թէ խմբագրական կազմը օժտուած է նոր անդամով մը՝ յանձին Դալար Շահինեանի որպէս օգնական խմբագիր: Խմբագրական կազմի միւս անդամներն են Ասպետ Գոչիկեան (գլխաւոր խմբագիր), Տիգրան Խալիկեան (վարիչ խմբագիր) եւ Վարդան Մատթէոսեան (գրախօսականներու խմբագիր)։
Վերջին թիւի առաջին յօդուածին հեղինակն է Ալբերտ Ստեփանեանը, որ վերաքննութեան կ՚ենթարկէ Մովսէս Խորենացիի «Հայոց պատմութիւն» գործէն որոշ հատուածներՙ զանոնք բաղդատելով յունական եւ հայկական այլ աղբիւրներու հետ:
Անոր կը յաջորդէ Ռուբէն Շուգարեանի յօդուածը, որ կ՚անդրադառնայ Հայաստանի եւ Թուրքիոյ միջեւ յարաբերութիւնները բնականոնացնելու միտող ջանքերուն եւ անոնց ձախողութեան, իսկ երրորդ յօդուածը զրոյց մըն է Թաներ Աքչամի, Ուղուր Ումիտ Ունկորի եւ Մեհմետ Փոլաթելի միջեւ՝ հայոց ցեղասպանութեան ընթացքին հայերէ բռնագրաւուած կալուածներուն եւ հարստութեանց մասին:
Թիւը գրախօսականներ կը պարունակէ նաեւ։ Լեւոն Չորպաճեան գրախօսած է հայկական ցեղասպանութեան եւ անոր հետեւանքներուն նուիրուած չորս հատորներ, իսկ Լեռնա Էքմեքճիօղլու անդրադարձած է Լեւոն Եօթնեղբայրեանի յուշերուն նուիրուած հատորին: Լեւոն Սարեան գրախօսած է Յակոբ Մանանդեանի «Տիգրան Բ. եւ Հռոմ» դասական գործի անգլերէն թարգմանութիւնը, իսկ Վարդան Մատթէոսեան՝ Գարեգին Նժդեհի յօդուածներու ժողովածուի մը անգլերէն թարգմանութիւնը։
Դալար Շահինեան բաղդատական գրականութեան դոկտորի իր վկայականը ստացած է Քալիֆորնիոյ համալսարանի Լոս Անճելըսի մասնաճիւղէն եւ ներկայիս կը դասաւանդէ Քալիֆորնիոյ նահանգային համալսարանի Լոնկ Պիչի մասնաճիւղի բաղդատական գրականութեան բաժանմունքին մէջ: Ան կ՚աշխատի արեւմտահայ գրականութեան նուիրուած ուսումնասիրութեան մը վրայ, բաղդատելով համաշխարհային Ա. եւ Բ. պատերազմներէն ետք յաջորդաբար Փարիզի եւ Պէյրութի մէջ զարգացած արեւմտահայ գրականութեան ու լրագրութեան կեդրոններուն իւրայատկութիւնները, ինչպէս նաեւ անոնց կապերը Խորհրդային Հայաստանի, Հիւսիսային Ամերիկայի եւ Միջին Արեւելքի այլ երկիրներու հայութեանց հետ: Ան յաճախ կը գրէ համացանցային «Քրիթիքս Ֆորում» թերթին մէջ ու վարիչն է «Սարոյեան ծրագրին», որուն նպատակն է բարելաւել Գլենդէյլի Շամլեան ազգ. վարժարանի մէջ հայերէնի դասաւանդման եղանակները:

No comments:

Post a Comment