27.6.11

Հանդիպում՝ գրականագէտ եւ պատմաբան դոկտ. Վարդան Մատթէոսեանի հետ

ՊԷՅՐՈՒԹ.- Կազմակերպութեամբ Լիբանանահայ Գրողներու Համախմբումին, երէկ` Հինգշաբթի, 23 Յունիս 2011-ին, երեկոյեան ժամը 7:30-ին, «Կամար» պարբերաթերթի խմբագրատան մէջ տեղի ունեցաւ հանդիպում գրականագէտ եւ պատմաբան դոկտ. Վարդան Մատթէոսեանին հետ` ներկայութեամբ գրողներու եւ գրասէրներու:
Ձեռնարկին բարի գալուստի խօսքը արտասանեց «Կամար» պարբերաթերթի խմբագիր Ժիրայր Դանիէլեան, ապա Վարդան Մատթէոսեանին մասին խօսեցաւ տոքթ. Արմենակ Եղիայեան: Մատթէոսեանի կենսագրութեան հակիրճ գիծերը ներկայացնելէ ետք, Եղիայեան աւելցուց, որ Մատթէոսեանի եւ այլ գրականագէտներու ուսումնասիրութիւններուն իբրեւ արդիւնք Կոստան Զարեան հայ գրականութեան անդաստանին մէջ յայտնուած է իր արժանի բարձունքին վրայ: Տոքթ. Արմենակ Եղիայեան հաստատեց, որ Մատթէոսեան գրականագէտի տուեալներով իր ուսումնասիրութիւնները ամենայն լրջութեամբ կը կատարէ` հրապարակ բերելով բազմաթիւ ճշմարտութիւններ:
Ապա խօսք առաւ Վարդան Մատթէոսեան, որ անդրադարձաւ արժանթինահայ գրողներուն: Ան ներկայացուց բազմաթիւ հայագիր եւ օտարագիր գրողները, որոնցմէ նշեց Վարդան Գէորգեանը, Ռուբէն Վարդանեանը (Ռէն), Յարութիւն Աստուրեանը, Աշոտ Արծրունին եւ ուրիշներ: Մատթէոսեան նաեւ խօսեցաւ Արժանթինի գաղութի դժուարութիւններուն, գրողներու խնդիրներուն եւ Հայաստանի Հանրապետութեան հետ գաղութին ունեցած յարաբերութիւններուն մասին: Այս շրջագիծին մէջ ան շեշտեց, որ Հայաստանի իշխանութիւնները յատուկ ուշադրութեամբ կը հետեւին արժանթինահայ գաղութի աշխատանքներուն:
Զեկուցումէն ետք Վարդան Մատթէոսեան պատասխանեց ներկաներուն հարցումներուն:
«Ազդակ», Յունիս 24, 2011

No comments:

Post a Comment